ചെന്നൈ: കമിതാക്കള്‍ക്കൊരു സന്തോഷ വാര്‍ത്ത, പ്രത്യേകിച്ചും കാമുകന്‍മാര്‍ക്ക്. നിങ്ങളുടെ കാമുകി പ്രായപൂര്‍ത്തിയാവാത്തവളാണെങ്കിലും ഇനി വിവാഹം കഴിക്കാം. മദ്രാസ് ഹൈക്കോടതിയാണ് ഇത്തരമൊരു വിധി പുറപ്പെടുവിച്ചിരിക്കുന്നത്.
തമിഴ്‌നാട്ടിലെ തിരുവള്ളൂര്‍ ജില്ലയിലെ പതിനേഴ് വയസ്സുള്ള പെണ്‍കുട്ടി തന്റെ കാമുകനോടൊത്ത് ഒളിച്ചോടുകയും പിന്നീട് വിവാഹിതയാവുകയും ചെയ്തിരുന്നു. പെണ്‍കുട്ടിയുടെ അഛന്‍ ഹേബിയസ് കോര്‍പസ് ഹരജി ഫയല്‍ ചെയ്തപ്പോള്‍, താന്‍ ഭര്‍ത്താവിന്റെ കൂടെ മാത്രമെ ജീവിക്കുകയുള്ളൂ എന്ന് പെണ്‍കുട്ടി കോടതിയില്‍ പറയുകയായിരുന്നു.
ഇത്തരത്തിലുള്ള വിവാഹങ്ങള്‍ സാധുവല്ലെങ്കിലും അസാധുവല്ല. പ്രായപൂര്‍ത്തിയാകാത്ത പെണ്‍കുട്ടിയുടെ വിവാഹം ശൈശവ വിവാഹ നിയമത്തിലെ സെക്ഷന്‍-3 ന്റെ ലംഘനമാണെങ്കിലും ഹിന്ദു വിവാഹ നിയമത്തിലെ സെക്ഷന്‍ 9, സെക്ഷന്‍18 പ്രകാരം പെണ്‍കുട്ടി കുറ്റക്കാരിയല്ലെന്ന് വിധിയില്‍ പറയുന്നു.
പ്രായപൂര്‍ത്തിയാകാത്ത പെണ്‍കുട്ടി പ്രായപൂര്‍ത്തിയായ പുരുഷനുമായുള്ള (പ്രണയ) വിവാഹം ഇനി നിയമവിധേയമാണെന്ന് പറയേണ്ടി വരും. അത്‌കൊണ്ടുതന്നെ വിവേകമുള്ള പുരുഷനുമൊത്ത് ജീവിക്കാന്‍ പ്രായപൂര്‍ത്തിയാകാത്ത പെണ്‍കുട്ടി ജീവിക്കാന്‍ തീരുമാനിച്ചാല്‍ ഇനി തടയാനാവില്ല.
വിവാഹം കഴിക്കാമെങ്കിലും പ്രായപൂര്‍ത്തിയാകുന്നത് വരെ പെണ്‍കുട്ടിക്ക് വിവാഹം കഴിഞ്ഞ് ഭര്‍ത്താവിനൊപ്പം പോകാനാവില്ലെന്നും വിധിയിലുണ്ട്.
